Şamaxı rayonunda keçirilən “Shamakhi Open 2025” beynəlxalq şahmat festivalı təkcə bir idman tədbiri deyil, həm də Azərbaycanın intellektual potensialını nümayiş etdirən mühüm diplomatik və mədəni hadisədir. Bu festival həm regional inkişaf siyasətinin, həm də ölkəmizin beynəlxalq nüfuzunun artmasının bariz göstəricilərindən biridir.
Festivalın açılış mərasimində tanınmış ictimai-siyasi və idman xadimlərinin – Azərbaycan Şahmat Federasiyasının birinci vitse-prezidenti Faiq Həsənovun, Şamaxı Rayon İcra Hakimiyyətinin müavini Mehriban Eyubovanın və Vüqar Həşimov Fondunun prezidenti Anar Allahverdiyevin iştirakı onun yüksək statusunu və rəsmi dəstəyini bir daha təsdiqlədi. Bu çıxışlar sadəcə rəsmi təbriklər deyildi – onlar şahmata verilən strateji dəyərin ifadəsi idi.
Festivalda 7 ölkədən 102 zəka sahibinin iştirakı Azərbaycanın idman diplomatiyasında əldə etdiyi mövqeyin təsdiqidir. Təsadüfi deyil ki, turnirin təşkili Gənclər və İdman Nazirliyi, Azərbaycan Şahmat Federasiyası və Vüqar Həşimov Fondunun birgə əməkdaşlığı ilə reallaşdırılıb. Bu əməkdaşlıq isə ölkənin dövlət və qeyri-dövlət institutlarının ortaq məqsəd uğrunda birləşməsinin nümunəsidir.
Yarışın A və B qruplarında keçirilməsi həm peşəkar, həm də yarı-peşəkar səviyyədə inkişafın təşviqinə xidmət edir. Klassik formatın üstünlük təşkil etməsi yarışın ciddiliyini və keyfiyyətini artırır. Eyni zamanda rapid və blits turnirləri də festivalın dinamikliyini və müxtəlif auditoriyalara yönəlməsini təmin edir.
Mükafat fondunun ümumi həcmi – 23.150 manat, xüsusilə də A qrupunun qalibinə veriləcək 5.000 manatlıq mükafat bu tədbirin həm stimullaşdırıcı, həm də rəqabətqabiliyyətli xarakterini gücləndirir.
Belə tədbirlər, bir tərəfdən Azərbaycanın bölgələrində intellektual həyatın canlandırılması, digər tərəfdən isə gənclərin bu sahəyə marağının artırılması baxımından önəmli rol oynayır. “Shamakhi Open 2025” festivalı sübut edir ki, Şamaxı təkcə ədəbi və mədəni irsi ilə deyil, həm də zəka oyunlarının yeni mərkəzi kimi tanınmağa layiqdir.
